Joh 6 | WSK | STEP | Udagi te Jesus yu batoga Galilee komasang te kasu kaparam. Yu batoga Galilee ko nup bo mu Tiberias.

John 6

Jesus kari 5000 na nungaram

(Mat 14:13-21; Mark 6:30-44; Luke 9:10-17)

1 Udagi te Jesus yu batoga Galilee komasang te kasu kaparam. Yu batoga Galilee ko nup bo mu Tiberias. 2 Se kariimet motam biya nu kilek bibiya sokel ago kariimet kuera ikes ago mu nungumik te beteram se aringiman, ale ko aolak iluman kowom karoman. 3 Se Jesus aolak iluwam duruk dopang te nama tarigiram ale ko olekem arungu daigam bagakaso. 4 Juda nunga Passover ko tom biya mu pingi aram.

5 Se Jesus motam patowaram kariimet motam biya nukote taiwaman mu nungarkam. Ale nu Philip isuam, “Ana aparete bread dianak ale kariimet ewere nungarnak se namonko ya?” 6 Bare nu kota mel bitirukko mu nu maingkala ko iki se, bare nu Philip am ira arikaso.

7 Se Philip noko den koma balam, “Bare ana sige suen biya ko ura tanak ale koma manga tanak ale na inang te dianak, bare kariimet biya imi karogo me terong maukko pa!” ^{▼▼John 6:7 Greek den te 200 denarii. Kowar suwanta mu ko ura koma denarius suwanta iwita.}

8 Se Jesus ko olekem bo nup Andrew, nu Simon-Peter ko uria, mu nu iwita balam, 9 “Kuriang bo bagoso imi bread barley 5, se ko wal ilagala ago bagoso. Bare mu kariimet motam biya imi ago me terong mam!”

10 Se Jesus ko olekem nunga maonam, kariimet nunga manarmon se dagimonko balam. Kuwim umu sirsir biya. Se kari 5000 mu te dagiman bagakasan. 11 Se Jesus bread tam iluwam, Kaem amilmil tuam, pakokaram, ale olekem nuguting te awuram, se karogo nama kariimet dagiman bagaman mu nungaru nungaru ago namaman, suwan suwan nunga nongomang te na namon se nungumik ago terong maukko ikiwaman mu te diram nungarman. Aking wal tam ale betelatala beteram.

12 Se nuna suen la inang naman terong mam, asele Jesus ko olekem nunga maonam, “Nina na nuamur bolala awuralko, sang yam aniruk maguruk bore ko.” 13 Se nuna bread barley 5 mu ko na nukum yam aniram mu bolala awuman ale korokem 12 ningi tugu tugu ago namaman se kuring aratu namaram.

14 Se kariimet nu kilek mu beteram mu aringiman ale balman, “Nunguningta nunguning, imi Prophet ali ewerete tairukko balukasan se ana iki lagaman borta tairam.” ^{▼▼John 6:14 Moses Prophet bo tairukko balam: Deuteronomy 18:15.} 15 Bare Jesus nu ikiam nuna nu ilumon ale nunga king ko betemon se bagurukko iwita ikiam. Buta se nu kota barasam duruk kulupik ningi namaram.

Jesus yu guang awete aolak iluwam

(Mat 14:22-23; Mark 6:45-52)

16 Turom bainga ningi olekem alo yu Galilee norogen te nama kapaman. 17 Ale dal te aragaman ale peleman Capernaum namakasan. Se turom batagam bare Jesus nuna nongote me taikaso. 18 Se daula biya barasam ale gagi magaram. 19 Nuna wos iluman ale yu tuagu te awar biya namangaman se Jesus yu guang awete aolak iluwam nongote pingi taikaso se aringiman ale ninguru nguangakasan. 20 Bare nu nunga maonam, “Nina me nguangaralko!” mam. “Imi anigita!” ^{▼▼John 6:20 Greek den te “ego eimi” aniso, se ko nunguning mu “ani bagasam”: Exodus 3:14.} 21 Se nuna amilmil ago dal te giman, ale tairatela kuwim nuna te namangaman mu te nama arataman.

22 Ukiram se kariimet yu komasang te am animan mu barasaman ale Jesus kupukasan. Ale balukasan,“Ekalako dal suwanta diram imi te bagaram se Jesus ko olekem nongota te namaman. Bare nu arungu me namaram,” ma balu se Jesus kupukasan. 23 Bare udagi Tiberias wonong ko dal saki tai kuwim Jesus kariimet te na nungaram se naman mu te tai arataman. 24 Se kariimet umu ikiman, “Jesus ko olekem arungu sor imi te mena pa!” maman, ale nuna dal mu aragaman ale ko loagomonko Capernaum namaman.

Jesus mu anananga inang nunguning ko den

25 Nuna yu batoga sang te Jesus ari gilingiman ale nu isarman, “Kari Biya, ni amaru ewela tairem a?” maman.

26 Se Jesus balam, “Ani nunguningta ninga manorsam, nina aninga kilek kasa sokel ago mu aringiman mu ko me aninga loagaman ale agowom karosan. Mena. Mu nina ani na ningarem se naman ningimik ago terong mam mu ko agowom karosan. 27 Nina na inang ko magara tairate mu ko me sail tagiralko! Na inang tom suen biya te marak bagaralko mu ko la sail tagiralko! Kari ko Kuriang na umutang ningarukko. Mu awuk, Ba Kaem kota gomang tuam ale balu beteram se bagoso.”

28 Jesus buta balam se nuna isarman, “Ana awuk manak ale Kaem ko ura ko gomang aniso mu betenakko?”

29 Se Jesus nunga maonam, “Kaem ko ura nina beteralko gomang aniso mu iwita: nina kari nu beteram se tairam umu ko nengemang ningi nunguning arukko.” ^{▼▼John 6:29 Ana Jesus ko nangamang ningi nunguning arukko mu mel gira: 1 John 3:23; 5:11-12.}

30 Se nuna nu manorman, “Ni kilek biya awuk bore bitar se ana aringinak ale te nika den ko nangamang ningi nunguning arukko? 31 Nanga taleng alo sor garagarayam te na manna mu no se te bagakasan. ^{▼▼John 6:31 Manna: Exodus 16:4-15.} Kaem den iwita balam butata, ‘Nu inang duruk wonong te mu nungaram se nokasan.’”

32 Se Jesus nunga maonam, “Ani nunguningta ninga manorsam, Moses mu duruk wonong ko inang nunguning nina me ningaram. Mena. Mu aninga Ait duruk wonong ko inang nunguning nina ningarso. 33 Mu Kaem ko inang nunguning mu kari duruk wonong beteram ale ali imi te tairam ale kariimet marak nunguning nungarso borta.”

34 Nu uwuta balam se nuna nu manorman, “Kari biya, tom suen biya na inang ni balsam sumu nangaru se nanakko.”

35 Se Jesus nunga maonam, “Inang kariimet marak nunguning nungarso mu anigita. Se kari awiriya aningate tairuk, mu na ko me kuerukko. Se kari awiriya ani ago ko gomang ningi nunguning aruk, mu yu ko me kuerukko.

36 “Bare ani maingkala ninga manem, nina ani agarkasan, bare ago ko me nengemang ningi nunguning aso. 37 Kariimet suen la aga Ait ani nunga aisiso, mu aningate taisan. ^{▼▼John 6:37 Kariimet Jesus kote namasan: John 17:6-8.} Se awiriya aningate taiso, mu ani bo me karikkowo! Mena. 38 Mu awuk, ani agata aga ikia karo tuekko duruk wonong beterem ale ali imi te me tai kaperem. Mena. Ani tai kaperem mu Kari aga beteram se tairem mu ko kuring karo tuekko. 39 Se Kari aga beteram se tairem mu ko gomang iwita: kariimet nu ani nunga aisam, mu bo ani me bitirik se sarenga namurukko. Mena. Ani tom nukum te suen la nunga amumek se barasomonkowo! ^{▼▼John 6:39 Jesus ko kariimet ninguru nunga sinar taso: John 10:28-29; 17:12.} 40 Aninga Ait ko gomang mu iwita: kariimet noko Namar aringimon ale ko nongomang ningi nunguning aruk, mu marak ningo tom suen biya te bagomonko mu tamonko. Se ani tom nukum te kariimet umutang nunga amumek se barasomonkowo!”

41 Nu uwuta balam se Juda alo ikiman ale noko nongomang magaram se den suen biya balukasan. Mu awuk, nu balam, “Inang duruk wonong te tai kaparam mu anigita.” 42 Se nunumi manarukasan, “Kari imi nu Joseph ko namar, Jesus i. Ana noko nuam nuet nunga ikisan! Se nu awuk se numi balso duruk wonong te tai kaparam maso?”

43 Nuna uwuta nunumi manarukasan, se Jesus nunga maonam, “Nina nengeta ninimi isaru lagasan mu beteralko! 44 Kari bo kota ko ikia te aningate tairukko me terong. Kariimet aga Ait aga beteram se tairem wore nunga diruwuso umutang la aningate taimonko. Se tom nukum te ani kariimet umu nunga amumekko. 45 Den prophet nunga batoga te aniso mu iwita balso, ‘Kaem kariimet suen biya nunga kausokko.’ Se kariimet aga Ait ko ikia nunga kasurso se ikisan, mu kariimet umutang aningate taimonko.

46 “Kari bo ta Kaem me arigam. Bare ani mu asele nu arigem, mu awuk, ani nu ilak baga taira se. 47 Ani nunguningta ninga manorsam, kari ani ago ko gomang ningi nunguning aso, mu nu marak yawara tom suen biya te bagurukko mu taso. 48 Inang marak tom suen biya te bagara ko mu anigita. 49 Nenenga taleng girigir ali sor garagarayam te inang manna no lagakasan, bare nuna kua gilingiman. 50 Bare inang duruk wonong ko tai kaparam mu duap bo, se awiriya nauk mu me kuerukkowo! 51 Inang marak sokel ago duruk wonong te tai kaparam mu anigita. Awiriya inang imi nauk, mu nu tom suen biya marak bagurukko. Se inang ani tuekko mu aninga angimik nunguning, ali imi ko kariimet nungarik se tom suen biya marak yawara te bagomonko.”

52 Nu uwuta balam se Juda alo nongomang magaram se den tagi gurugumukasan ale balukasan, “Kari ewere awuk noko kumik nunguning nangaruk se nanakko wore balso ya?” makasan.

53 Se Jesus nunga maonam, “Ani nunguningta ninga manorsam, nina Kari ko Kuriang ko kumik nunguning me nal, ale ko kumik gue me nal, mu nina nengeta ningimik marak nunguning bo mena. 54 Awiriya aga angimik nunguning se aga angimik gue naso, mu nu marak yawara tom suen biya te bagurukko mu karogo. Se ani tom nukum te nu amumek se maragurukko. 55 Mu awuk, aninga angimik nunguning mu inang nunguning, aninga angimik gue mu yu nunguning. 56 Awiriya aninga angimik nunguning naso ale aga angimik gue naso, mu nu ani agarak bagoso, se ani nu ilak bagasam. 57 Aninga Ait marak sokel ago nu aga beteram se tairem, ale ani noko marak sokel te bagasam. Se butatala, awiriya angimik nunguning, se angimik gue naso, mu nu aninga marak sokel te bagurukko. 58 Inang duruk wonong te tai kaparam mu anigita. Mu inang manna, girakala nenenga taleng girigir naman ale baga kuakasan, mu iwita mena. Imi inang nunguning, awiriya nauk mu tom suen biya marak bagurukko,”

59 Jesus Capernaum nunga synagogue ningi kariimet den nunga kasuruwa se den imi balam.

Jesus mu marak den ko duap

60 Se olekem motam biya den mu ikiman ale balman, “Den imi aora biya!” makasan. “Se awiri den ewere ikiokko?”

61 Jesus ikiam olekem nu den balam wore ko den tagi gurugumukasan mu ikiam, ale nu nunga maonam, “Den ani balsam imi nenenga ikia maguwuso e? 62 Se nina Kari ko Kuriang peleruk kuwim ulengkala te bagakaso mu te nama tarigiruk se arigalko, mu nina awuk ko ikialko? 63 Korang Bur borta kariimet marak nunguning nungarso, nongota nunga sokel te mu me terong. Den ani ninga manarukasam mu Bur ago, marak nunguning ago. 64 Bare nenenga ningi saki me nongomang ningi nunguning aso.” Jesus uwuta balam, mu awuk, nu girakala biya kariimet nongomang ningi me nunguning arukko mu nunga ikiam. Ale kari nu kager kari nuguting te bitirukko mu karogo ko ikiam. 65 Ale balam namakaso, “Mu borta ko ani ninga manem, kari bo ta yam kota aningate tairukko me terong. Bare aga Ait kari mu sanguk mu asele aningate tairukko.”

66 Se umutang te ko noko olekem alo suen biya peleman ale udagi me kowom karokasan. 67 Se Jesus olekem 12 mu nunga maonam, “Se nina ago aninga beteral ale namaralko e?”

68 Se Simon-Peter den koma balam, “Kari Biya, buta mu ana awiri kote namanakko? Nikete den marak tom suen biya te bagara ko mu aniso. 69 Se ana aitakta nika ikiman ale nangamang ningi nunguning aram, ni Kaem ko Namar, kako nunguningkiri.”

70 Peter den mu balam se Jesus ko olekem alo nunga maonam, “Ani nina kari 12 aninga olekem ninga balem. Bare ninga ningi bo mu kari memek Satan ko ura kari!” Mu nu Judas, Iscariot kari Simon ko namar, wore ko balukaso. Judas mu nu olekem 12 owore nunga ningi bo, bare nu maingte Jesus memek te bitirukko wore Jesus giram ko balukaso.

71